Астанада Орталық Азия елдерінің және Үндістанның қауіпсіздік кеңестері хатшыларының/ұлттық қауіпсіздік жөніндегі кеңесшілерінің екінші кездесуі өтті. Жиынға Қазақстан Республикасы Қауіпсіздік Кеңесінің Хатшысы Ғизат Нұрдәулетов қатысты.
Іс-шара барысында қатысушылар өңірлік және халықаралық қауіпсіздіктің өзекті мәселелері, соның ішінде терроризм мен экстремизмге, қару-жарақ пен есірткінің заңсыз айналымына, трансұлттық ұйымдасқан қылмысқа қарсы іс-қимыл, сондай-ақ су, экологиялық және ақпараттық қауіпсіздікті қамтамасыз ету бағытындағы ынтымақтастықты дамыту жөнінде жан-жақты пікір алмасты.
Тараптар Ауғанстандағы қазіргі ахуалды және оның аймақтағы қауіпсіздік пен тұрақтылыққа әсерін талқылады.
Ғизат Нұрдәулетов әріптестерін халықаралық және өңірлік қауіпсіздіктің қазіргі кезде өзекті сын-қатеріне қатысты Қазақстанның ұстанымы жайында хабардар етті. Сонымен қатар «Орталық Азия – Үндістан» диалогы аясында серіктестік құру жөнінде бірқатар ұсынысын жеткізді.
Бұдан бөлек, Қазақстан тарапы еліміздің көлік-логистика және аэроғарыш салаларындағы мүмкіндіктері мен халықаралық ынтымақтастық перспективаларын таныстырды.
Жиын шеңберінде Қазақстан Республикасы Қауіпсіздік Кеңесінің Хатшысы Үндістанның Ұлттық қауіпсіздік жөніндегі кеңесшісі Аджит Довалмен екіжақты консультациялар өткізді. Кездесуде терроризмге қарсы күрес, киберқауіпсіздік, аэроғарыш индустриясын дамыту бағыттары бойынша елдеріміз арасындағы өзара ықпалдастықтың түрлі аспектілері қарастырылды.
